Kaujititsiutik

Kaujisattet sakKititsijut Kaujisagiamik ammalu Kaujimattisigiamut Pannaigutinik 

St. John’s, NF:  Kaujisattet Itsivautanga Victor Young ammalu KaujisattiuKatingit, Elizabeth Davis ammalu James Igloliorte, sakKititsijut Kaujititsiutimik Kaujisagiamut ammalu Kaujimatitsigiamut Pannaigutiujunik ullumi. 

Suliagigialingit Kaujisattiujuit kamagijauKattavut ulugianattotillugit kamagijaugiamut Newfoundlandimi ammalu Labradorimi sunait ingiggasiammangāta sunaillu pijaugunnasiangimangāta ammalu sakKititsigasuadlutik uKautjigiagutiugajattunik Kanuk nutāngutitsigiamut pitsatunittāgiallugillu nunagijamini Canadami. 

“Taimanganit suliaKagiasilaugattanit Juneminit, kamaluasimalikKugut pivalliatitsigiamik pannaigutiujunik tigulagiamut Kaujititsiutitsanik ammalu Kanuk isumaKajuKammangāt Newfoundlanderinit ammalu Labradorimiutanit ammalu asinginnit Canadamiunit Kanuk ākKisijuKagajammangāt Kaujisannitini suliagijattinik,” uKajuk Mr. Young.  “Pitjutauluajuk pannaigiamut inuit ilauKatausonguniammata ammalu pannaigutet pivalliataulutik titigattausimajutigut piunitsamik sakKititsigiamut ammalu imminik pisongunitsanginnut sivunitsatini. 

“Ulugiagijaunippaujut nunagijattini Canadami, kamagiluallugit sivunitsavut, pivitsaKattitautsiagiaKavuk.  53-ni jārini Kāngisimajuni IlauKataukKādluni, Newfoundland Labradorimilu Canadami uKautausonguvut ilangit uKumaittovut adjiugatik. 

“Ilangagulli, takunnavugut takuminattumik Newfoundland Labradorimilu.  Ilonnainik prāvinsinik aulatsivugut GDP-kutigut piguvalliagasuatillugit.  Utsualuvut ujagavut piguvalliatuinnavut, nutānik tataminattunillu suliatsaujunik sollu White Rose ammalu Tasiujatsuami.  Nutāk ikajuKatigenniujuk ammalu sulijutsadlutik pivallianiujunik akungani nunaKakKāsimajuit ammalu Kallunāt.  Takunnavugut katsungaitsiajunik inunnik, angijumik illigusujut nunaminik ammalu akunnimigut, atuinnaujut suliaKavatsuagiamik ammalu prāvinsivut piunitsautigasuallugu. 

“Ammalu asiagut, takunnavugut adjiungitumik.  Nunatsualimāmi ununnipāmik suliaKattuKangilak tamāni ammalu akikinnipānik akilittutaujut.  Prāvinsittini kavamavut piggagasuaKattavuk sakKititsigasuagiamut suliatsanik adjiutigasuadlugit ilonnalimāngani Canadami, akilittuiKattatilluta akitunippānik tāksinik nunatsualimāmi.  Āhammagik, Prāvinsimi kenaujait nāmmaKattangitut.  UKumaittusiuKattavugut kenaujait pititsitillugit piusiumititsigasuagiamut pititsitillugu adjigettumik suliatsanik ajunnatutsiuKattamata pitāgasuagiamut, piluattumik utsualunniajunit kenaujattāgiamut. 

“Oganniagusivut nunguvalliatuinnalikKut, malunnatommata piulimagasuagiamut  oganniagatsanik sollu natānnavait pijaugiatsangit ammalu suliagijaunitsangit kingupvait putjotivaillu suliaKapviujuni.  InuKutivut nunguvalliatuinnalikKut ikinnisauKattalimmata nutagait inoliujut Canadami ammalu tikiKattajuit asinginnit nunani tagiup akianit.  Ammalu, ilonnagalanga Newfoundland Labradorilu kenaujatsasiuttinut akiniattauKattamanik.” 

“Kaujisannivut Kaujimatitsigiamullu Pannaijavut takutsauKullugit suliatsaugialet, sakititsigumagatta pannaigusiujumik piunippautillugu ammalu imminik pisongunitsanginnut inuit.” 

Kaujisattiujuit takutitsivut ilonnanganik Kaujisanniujumik Kaujimatitsinitsaujumillu Pannaigiamut.  Kinugapviusimammata KaujisattisiKattajuit Maligatsangitigut, pingasogiaKavut imailingajut: 

1. Inulimāt Kaujimattitaunitsangit:  Pigiasillutik September 30-mi, inulimāt KaujimattitaulākKut ilonnāni Newfoundlandimi ammalu Labradorimi.  Pitsiagiamut ikajutsitaunitsangit uKautaujuit titigattausimajut, Kaujisattisijiujuit sakKititsijut Kaujimatitsiutimik titigattausimajumik ullumi.
   
    

2. katimanitsait:  Kaujisattisijet katimatitsiKattalākKut ikittotillugit katimajuit uKālautiKallutik sunait pitjutaujutsauluammangāta.  Taimaimmat, Kaujisattisijet pivitsaKattisijut sulijumik angmatitsigiamut uKālautiKajutsautillugit pivitsaugajattunik kamagijaujutsanillu akungani inuit suliaKattajut piluattumik ullumiulittuk.   
   
   

3.  Kaujisannik:  Kaujisannisaujut kititaKaniakKut Kaujisagiamut ammalu sakKititsilutik alakkasājatigut Kaujijausimajunik titigattaugesimajunik, piluattumik ilinniavitsuangujunit.  KaujisattuKasimammat pivallianiusimajuni ilingajunik Kaujisagiamut malidlugit Maligatsangit Kaujimatitsigiamut kiggatuttiKadlutik Memorial  Ilinniavitsuanginnik. 

“Tākkutigonak pingasutigut adjigengitutigut piusiusimajutigut, nigiuvugut nutānik ammalu Kanuk isumaKajuKagajammangāt,” uKajuk Mr. Young.  “KanuttosiammagikKugut tānna suliatsak pitjutigillugu ammalu pivitsaKattitaulāmmata inuit uKālattigiangit sivunitsanginnik.” 

Newfoundland Labradoriullu kavamanga uKajuk Kaujisattet Nutāngutitsigiamut Pitsatunittāsigiamullu Nunagijattinik Canadami Merz 19, 2002-mi,  UKālajuKatillugu Itsivautatsuamit.  April 19, 2002-mi, tilijausimajut kiggatuttisait Vic Young (Itsivautak), Najanguak Elizabeth Davis ammalu Idluatsaijik James Igloliorte, ammalu Barbara Knight, tullinga angajukKāp Kaujisattisijiujuni, uKautausimajut.  Kaujisattiujut pigiasilaukKut suliatsaminik June 3, 2002-mi. 

Kaujisattitsijiujut sakKititsilākKut pijagegutik Kaujititsiutimik June 30, 2003-mi. 

KaujisagiallagajakKusi Royal Commission, Kaujisattisijinit, Kagitaujatigut www.gov.nf.ca/royalcomm.  Ilumiutalet:  tukisititsiutinik inuit katimattitaunitsanginnik [ilautillugit katimanitsaulāttut], katimanitsait Kaujisannisaillu;  Tukingit Piusiugasuajuni;  Kaujisattingita suliagisimajangit sivungagut;  ammalu Kaujimatitsigiamut Titigattausimajut.

--- 

Kaujisagiallaviusot, fonnilugu:  Ms. Jacquie Brown Royal Commission Kaujisavingani:  Fonninga (709) 729-3200            Sukkajukkut:  (709) 729-3539  Kagitaujatigut:  mailbox@royalcomm.gov.nf.ca